Ang Papel ng Media sa Estado


press.jpg

 

Rey Tamayo, Jr.

Tungkulin ng mga peryodista at brodkaster na paglingkuran ang ating mga kababayan sa pamamagitan ng paghahatid ng makatotohanang balita at patas na impormasyon. Ito ang pangunahing papel ng media sa isang demokratikong bansa, ang maging mapagmatyag sa lahat ng pangyayari sa ating lipunan.

Matatandaang sa isang artikulong inilabas ng Time magazine hinggil sa kalagayan ng mga mediamen sa ating bansa kung saan ang bansang Pilipinas ay pangalawa sa pinakamapanganib na bansa sa buong mundo para sa mga peryodista bago ang bansang Iraq.

Tinatayang mahigit sa limampung peryodista na ang pinatay sa ilalim ng rehimeng Arroyo bagay na nakababahala na lantarang panggigipit sa malayang pamamahayag sa bansa. Si Hernani Pastolero, isang local newspaper editor na nakabase sa Sultan Kudarat, ang kauna-unahang manunulat na pinatay ngayong 2007 dahil sa pagtupad sa kaniyang tungkulin.

Kamakailan, minsang pang pinatunayang ng administrasyong Arroyo ang pagyurak sa kalayaan sa pamamahayag ng damputin at posasan ang ilang kagawad ng media na nagkober sa nabigong kudeta sa Manila Peninsula Hotel sa pangunguna nina Senador Antonio Trillanes IV , Brig. Gen. Danilo Lim at ilang sundalong Magdalo.

Kung sabagay, hindi naman dadamputin ang mga kasama naming peryodista kung walang basbas galing sa matataas na opisyal. Si Director Geary Barias ng National Capital Region Police Office (NCRPO) ang nag-utos na bitbitin ang lahat ng mediamen na kasama nila Sen. Trillanes sa loob ng hotel dahil sa ulat na ilang Magdalo members ang nagpanggap na mga mediamen para makapuslit sa barikada ng pulisya. Si Senior Supt. Asher Dolina ng Criminal Investigation and Detection Group-NCR Office naman ang nag-utos na posasan ang mga reporter bago ilabas ng hotel at isakay ng bus patungong Bicutan para isailalim sa interogasyon. At hindi rin gagawa ng aksyon ang mga opisyal ng PNP na damputin ang mga mediamen kung walang pahintulot galing naman sa Malacañang.

Nakababahala ang ganitong senaryo na pati ang mga peryodista’y sinasadkaan sa pagtupad ng tungkulin ng gobyerno ni pangulong Arroyo. Lalo pang naging tensyunado ng oras na iyon (Nobyembre 29, 2007) nang magdeklara si DILG sec. Rolando Puno ng curfew mula ika-12 ng hating gabi hanggang ika 5 ng umaga na ngayon lamang muli nangyari matapos ang panahon ng Martial Law ni dating pangulong Marcos. Kaya’t ang tanong ng iba, batas militar na ba ang pinapairal ni ginang Arroyo?

Magugunita na karamihan sa mga kinumpiskang gamit at dinampot na mga mamamahayag ay mga kasama nila Senador Antonio Trillanes IV at Brig. Gen. Danilo Lim sa ikalawang palapag ng Manila Peninsula Hotel.

Ano kaya ang pananaw ng Malacañang?

Na ang lahat ng mga mamamahayag na sumama kay Trillanes, Lim at Guingona sa loob ng hotel ay kalaban ng administrasyon at sumusuporta sa panawagan nilang pagbabago sa gobyerno ?

Ngunit alam naman ng lahat na ang layunin lamang ng mga taga media na sumasa sa mga Magdalo soldiers ay upang maiparating sa publiko ang tunay na kaganapan sa nasabing pag-aaklas laban sa administrasyong Arroyo.

Bagama’t humingi na ng paumanhin ang Palasyo sa mga peryodista, pinangangambahan pa rin na may posibilidad na maaari muling mangyari ang pagsikil sa kalayaan sa pamamahayag kaya’t hindi dapat magsawalang bahala. Kailangang bantayan ang soberanya at kondenahin ang pamahalaang Arroyo sa pambababoy sa Konstitusyon.

Ang dapat maintindihan ni pangulong Arroyo sa kasalukuyan takbo ng panahon sa ating bansa at sa isang prespektibong pananaw, kinakailangang gumalaw nang independyente ang media sa estado.

Tiyak na mamamatay ang demokrasya kung magkakasundo ang estado at media sa ngayon dahil kung mangyayari iyon sino pa ang babatikos at pupuna sa mga katiwalian sa gobyerno?

Halos mayor parte ng mga balita sa mga pahayagan, telebisyon at radyo ay laging mayroong kurapsyon na napapabalita sa hanay ng mga corrupt na politiko (hindi ko naman nilalahat) na ang hangad ay pakinabang pang sarili. Sa kabila ng mga pambabatikos ng mga kasamahan naming peryodista, tuloy pa rin ang mga matatakaw sa salapi na nasa gobyerno sa pagwaldas ng kaban ng bayan na pinagpapaguran ni Juan dela Cruz at napupunta lamang sa bulsa ng mga ganid sa kapangyarihan at kuwarta.

Ano pa kaya ang mangyayari kung wala na ang mga matatapang na peryodista at brodkaster na nagbubunyag ng mga kawalanghiyaan sa gobyerno?

Ang ideolohiya ng magkasalungat na prinsipyo ng media at estado na may kani kaniyang layunin ay hindi masama bagkus pa nga’y makakatulong sa ikabubuti ng bayan.

Leave a comment

No comments yet.

Comments RSS

Leave a Reply

Please log in using one of these methods to post your comment:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s